ബിനാനസിൽ 6.3 ബില്യൺ ഡോളറിന്റെ സുരക്ഷാ ലംഘനം; 3 ബില്യൺ ഡോളർ മരവിപ്പിച്ചു

ഏകദേശം 6.3 ബില്യൺ ഡോളർ (ഏകദേശം 23.1 ബില്യൺ ദിർഹം) മൂല്യമുള്ള ഡിജിറ്റൽ ആസ്തികളെ ബാധിച്ച സുരക്ഷാ ലംഘനം ബിനാൻസ് റിപ്പോർട്ട് ചെയ്തു. ടെതർ, സർക്കിൾ എന്നീ ബ്ലോക്ക്ചെയിൻ കമ്പനികളുടെ സഹായത്തോടെ ഇതുവരെ ഏകദേശം 3 ബില്യൺ ഡോളർ മരവിപ്പിച്ചതായി എക്സ്ചേഞ്ച് അറിയിച്ചു. ബാക്കി തുക കണ്ടെത്താനും വീണ്ടെടുക്കാനുമുള്ള ശ്രമങ്ങൾ അന്വേഷകർ തുടരുകയാണ്.

പ്രാഥമിക പരിശോധനയിൽ, ഒരു എഞ്ചിനീയറുടെ ലാപ്‌ടോപ്പ് ആക്രമണകാരി കൈവശപ്പെടുത്തി ആന്തരിക സംവിധാനത്തിൽ പ്രവേശിച്ചതായും അനധികൃത പിൻവലിക്കൽ ഇടപാടുകൾ നടത്തിയതായും സൂചനയുണ്ടെന്ന് കമ്പനി പറഞ്ഞു. വാലറ്റുകളുടെ സ്വകാര്യ കീകൾ ചോർന്നതിന് തെളിവില്ലെന്നും നഷ്ടം കമ്പനിയുടെ ഉപയോക്തൃ സുരക്ഷാ ഫണ്ടും സ്വന്തം ഫണ്ടും ഉപയോഗിച്ച് നികത്തുമെന്നും ബിനാൻസ് അറിയിച്ചു. ഉപയോക്താക്കളുടെ ആസ്തികൾ സുരക്ഷിതമാണെന്നും കമ്പനി വ്യക്തമാക്കി.

സുരക്ഷാ പരിശോധനകൾ പൂർത്തിയായ ശേഷം നിക്ഷേപവും പിൻവലിക്കലും പുനരാരംഭിക്കുമെന്ന് കമ്പനി പറഞ്ഞെങ്കിലും സമയപരിധി വ്യക്തമാക്കിയിട്ടില്ല. അന്തിമ നഷ്ടം ഇതുവരെ നിശ്ചയിച്ചിട്ടില്ല. വെള്ളിയാഴ്ച ഏഷ്യൻ വിപണിയിൽ ബിറ്റ്കോയിൻ ആറാഴ്ചയിലെ താഴ്ന്ന നിലയിലേക്കും ഈതർ രണ്ട് മാസത്തെ താഴ്ന്ന നിലയിലേക്കും വീണു.